Народниот театар од Битола со авторската претстава на „Железно небо“ на Марјан Георгиевски денеска ќе гостува на првото издание на Интернационалниот фестивал на монодрама „Verbum Est – Është Fjala“ што се одржува Поградец, Албанија. Во претставата настапува Марјан Георгиевски, а гласовите се на Јасмина Василева, Марко Богдановски, Марија Стефановска, Невена Ѓаковска. Покрај Македонија на фестивалот учествуваат монодрами од Италија, САД, Косово, Албанија, Украина, Колумбија и од Шпанија.
Георгиевски заедно со Александар Димовски го создаде овој “cinema theatre”, користејќи повеќе алатки кои ги пружа театарот и филмот.
– Се работи за приказна за еден Балканец, за сè она што му е обесено на вратот, за неостварените мечти, за „зацапаноста“ во малограѓанштината, за соништата кои не можат да се остварат. За тоа кога сме притиснати до ѕид – како животни, кога немаме друг избор освен да го земеме животот во сопствени раце – велат од театарот.
Дизајнот на звук и музика е на Александар Димовски, видео-оператор е Владимир Переловски, а фотографијата на плакатот Сашо Илковски.
